အရေးပေါ်အခြေအနေ ကာလအတွက် အမျိုးသားပညာရေးသည် အရေးအခင်းများကြောင့် ထိခိုက်ခံစားနေရသည့်  မြန်မာနိုင်ငံရှိ ကလေးသူငယ်များအတွက် အားလုံးပါဝင်ပြီး အရည်သွေးရှိသည့် ပညာရေးကို ပံ့ပိုးပေးနိုင်ရန်အတွက် အရပ်ဘက်လူမှုအဖွဲ့အစည်းများ၊ ပြည်တွင်းနှင့် နိုင်ငံတကာ NGO များ၊ ကုလသမဂ္ဂအေဂျင်စီများအား အတူပါဝင်လုပ်ဆောင်စေသည်။ ၎င်းကို UNICEF နှင့် Save the Children တို့မှ ပူးတွဲ ဦးဆောင်သည်။ ၂၀၁၂ ခုနှစ်တွင် ပညာရေးဦးဆောင်လုပ်ငန်းအဖွဲ့ (ETWG) သည် အရေးပေါ် အခြေအနေတုန့်ပြန်မှုတွင် ပညာရေးဆိုင်ရာ ညှိနှိုင်းဆောင်ရွက်မှုအတွက် အစပိုင်းတွင် တာ၀န်ယူခဲ့သည်၊ သို့သော် ၂၀၁၃ ခုနှစ် မေလတွင် ပိုမို တရားဝင်ဖွဲ့စည်းထားသော ညှိနှိုင်းမှုယန္တရားတစ်ခုဖြစ်သည့် အရေးပေါ် အခြေအနေပညာရေး (EiE) ကဏ္ဍကို လူသားချင်းစာနာထောက်ထားမှုဆိုင်ရာ ညှိနှိုင်းရေး ဖွဲ့စည်းပုံ၏ အစိတ်အပိုင်းတစ်ခုအဖြစ် တည်ထောင်ခဲ့သည်။ EiE ကဏ္ဍသည် လူသားချင်းစာနာ ထောက်ထားမှုဆိုင်ရာ ညှိနှိုင်းရေးအဖွဲ့ (HCT)ကို ပံ့ပိုးပေးသော အုပ်စုအချင်းချင်း ညှိနှိုင်းရေးအဖွဲ့ (ICCG) ၏ အဖွဲ့၀င်ဖြစ်သည်။ ဒေသတွင်း EiE ကဏ္ဍ ညှိနှိုင်းဆောင်ရွက်မှုသည် (ကချင်ပြည်နယ်တွင်) မြစ်ကြီးနား ၊ (ရခိုင်ပြည်နယ်တွင်) စစ်တွေ  နှင့် (ရှမ်းပြည်နယ်အတွက်) လားရှိုးတွင် တက်ကြွစွာ လုပ်ငန်းဆောင်ရွက်လျက်ရှိသည်။

အရေးပေါ် အခြေအနေ ပညာရေး (EiE) ကဏ္ဍ၏ ယေဘူယျ ရည်မှန်းချက်မှာ မြန်မာနိုင်ငံရှိ ရခိုင်၊ ကချင်နှင့် ရှမ်းပြည်နယ်တို့မှ လူသားချင်းစာနာထောက်ထားမှုဆိုင်ရာ အဓိက အကျပ်အတည်း သုံးခုအား မဟာဗျူဟာမြောက် တုံ့ပြန်ရန် သက်ဆိုင်သူများကို စည်းရုံး၊ ညှိနှိုင်းခြင်းအားဖြင့် အချိန်နှင့်တပြေးညီ ထိရောက်သော ပညာရေး တုန့်ပြန်ညှိနှိုင်းဆောင်ရွက်မှုကို ထောက်ပံ့ပေးနိုင်ရန် ဖြစ်သည်။ ထိုမျှမက  သဘာဝဘေးအန္တရာယ်အသစ်များ ဖြစ်ပေါ်စေသော သဘာဝ သို့မဟုတ် လူလုပ်ဘေးအန္တရာယ်များကို ထိရောက်စွာတုန့်ပြန်နိုင်ရန်အတွက် ကြိုတင်ပြင်ဆင်နိုင်မှုစွမ်းရည်ကို ထောက်ပံ့ရန်ဖြစ်ပါသည်။