Pcodes သည် “နေရာသင်္ကေတကုဒ်” အတွက် အတိုချုပ်အသုံးအနှုံးဖြစ်သည်။ ၎င်းသည် zip သင်္ကေတကုဒ် သို့မဟုတ် စာတိုက် သင်္ကေတ ကုဒ်နှင့်တူပြီး၊ မြန်မာနိုင်ငံတစ်ဝှမ်းရှိ နေရာဒေသပေါင်း ၇၁,ဝဝဝ ဝန်းကျင်ခန့်ကို သီးခြား ရည်ညွှန်း သင်္ကေတကုဒ်များအဖြစ် သတ်မှတ်ပေးသော အချက်အလက် စီမံခန့်ခွဲမှုစနစ်၏ အစိတ်အပိုင်းတစ်ခု ဖြစ်သည်။ သုတေသနနှင့် လူသားချင်း စာနာ ထောက်ထားမှုနှင့် ဖွံ့ဖြိုးမှုဆိုင်ရာ အဖွဲ့အစည်းများ အပါအဝင် အရင်းအမြစ်မျိုးစုံမှ စုဆောင်း ကောက်ယူထားသော သတင်း အချက်အလက်များ အပေါ်တွင် အခြေခံသော မြန်မာနိုင်ငံအတွက် Pcodes စနစ်ကို MIMUမှ ပြုစုထိန်းသိမ်းထားရှိပါသည်။ အရင်းအမြစ် တစ်ခုထက် မကသော နေရာများမှ အချက်အလက်များကို စုစည်းဖော်ပြနိုင်ရန်အတွက် စနစ်တကျ သတ်မှတ်ထားသော Pcode System မရှိပဲ ဆောင်ရွက်နိုင်မည်မဟုတ်ပေ။

Pcodes သည် သတင်းအချက်အလက် ပံပိုးပေးသူများနှင့်အသုံးပြုသူများကို အစိုးရဌာနများ၊ မြန်မာနိုင်ငံတွင် လုပ်ကိုင် ဆောင်ရွက်နေကြသော ကုသမဂ္ဂအဖွဲ့အစည်းများ၊ အလှူရှင်များ၊ ဒေသန္တရနှင့် နိုင်ငံတကာ NGOs များက ဆောင်ရွက်သော ဆန်းစစ်ချက်များ နှင့် ကွင်းဆင်း လေ့လာမှုများ အမျိုးမျိုးတို့မှ အချက်အလက်များ အပါအဝင် ကျယ်ပြန့်များပြားလှသော ရင်းမြစ်မျိုးစုံတို့မှ ရရှိနိုင်သည့် သတင်းအချက်အလက်များကို ဖလှယ်ရန်၊ ချိတ်ဆက်ရန် နှင့် မြေပုံများ ထုတ်ယူရရှိနိုင်စေရန် အထောက်အကူပြုပါသည်။ Pcode စနစ်ကို အသုံးပြုခြင်းဖြင့် အဖွဲ့အစည်းများသည် ၎င်းတို့၏ သက်ဆိုင်ရာ လုပ်ငန်းများအတွက် အချက်အလက်များကို မိမိတို့ အသုံးတည့်သည့် အတိုင်း လွယ်ကူစွာ ထုတ်ယူ ရရှိနိုင်မှာ ဖြစ်သလို၊ အခြား အဖွဲ့အစည်းများ အလွယ်တကူ အသုံးပြုနိုင်စေရန် လည်း လုပ်ဆောင်နိုင်မှာ ဖြစ်ပါသည်။

မြန်မာနိုင်ငံရှိ ပြည်ထောင်စု နယ်မြေ၊ ပြည်နယ်/ တိုင်းဒေသကြီးများ၊ ခရိုင်များ၊ မြို့နယ်များ၊ မြို့များ၊ ရပ်ကွက်များ၊ ကျေးရွာအုပ်စုများ နှင့် ကျေးရွာများ အလိုက် Pcodes များရရှိနိုင်ပါသည်။ ဒုက္ခသည် စခန်းများမှ ကောက်ယူရရှိသော သတင်းအချက်အလက် မျှဝေခြင်းကို အထောက်အကူ ပြုစေရန် အဆိုပါနေရာများ အတွက်လည်း ထပ်ဆောင်း Pcodes အစုတစ်ခုကို လည်း သတ်မှတ်ထားပါသည်။ Pcode တစ်ခုစီတွင် အဆိုပါ နေရာကို လူအများ သိရှိသည့်အမည်၊ စံနှုန်းကိုက်စနစ် တစ်ခုအပေါ်တွင် အခြေခံလျက် အင်္ဂလိပ်ဘာသာ အက္ခရာ အဖြစ်သို့ ပြောင်းလဲထားသော အမည် နှင့် လူသားချင်း စာနာ ထောက်ထားမှု ဆိုင်ရာ ပံ့ပိုးကူညီမှု လိုအပ်သော ပဋိပက္ခ အခြေအနေများတွင် လျာထားချက်များ ရေးဆွဲခြင်း၊ ညှိနှိုင်း ဆောင်ရွက်ခြင်းနှင့် ကျေးရွာ၏ တည်နေရာများကို ဖော်ထုတ်ခြင်း တို့အတွက် ကျေးရွာ တစ်ခုစီ၏ တိကျသော မြေပုံရေးဆွဲခြင်းက ဆောင်ရွက်နိုင် စေရန် GPS စနစ် အသုံးပြုထားသည့် တည်နေရာ ဆိုင်ရာ အချက်အလက်များ လည်း ပါဝင်ပါသည်။

Pcode စနစ်တွင် ရင်ဆိုင်နေရဆဲ အခက်အခဲများ

• Pcode စာရင်းတွင် ပါဝင်မနေသော ကျေးရွာများ - ဤပြဿနာသည် သွားရောက်ရန် ခက်ခဲသော ဒေသများ သို့မဟုတ် တည်နေရာ ပြောင်းသွားသော ကျေးရွာများတွင် ဖြစ်ပေါ်နိုင်ပါသည်။ MIMU သည် အဆိုပါ ကျေးရွာ၏ တည်ရှိသည့် နေရာကို အတည်ပြုနိုင်ရန် လိုအပ်သော သတင်းအချက်အလက် ရရှိသည် နှင့်တပြိုင်နက် Pcodes အသစ်များကို စာရင်းသွင်း ပေးပါသည်။ “မြန်မာနိုင်ငံ တစ်ဝှမ်းရှိ ကျေးရွာများအား မြေပုံပေါ်တွင် ဖော်ပြပေးနိုင်မှု လက်ရှိအနေအထား” ဟူသည့် မြေပုံကို လေ့လာကြည့်လျှင် မြို့နယ်အလိုက် ယေဘူယျ အားဖြင့် ရေးဆွဲ ဖော်ပြပေးနိုင်သည့် ကျေးရွာ ရာနှုန်းများကို သိရှိနိုင်ပါသည်။

• GPS တည်နေရာမရရှိခြင်း - လက်ရှိအချိန်တွင် Pcodes များရှိသော ကျေးရွာများ၏ ၇၉% သာလျှင် မြေပုံ ရေးဆွဲ ဖော်ပြနိုင်ပါသည်။ MIMU သည် ကျန်ရှိ နေသေးသော ကျေးရွာများ အတွက် တိကျသော GPS အညွှန်း (လတ္တီတွဒ်/ လောက်ဂျီ်ကျု)များ ရရှိရန် GIS ပညာရှင်များ ပေါင်းစုအဖွဲ့၊ အဖွဲ့အစည်းများနှင့် အစိုးရဌာနများ ၏ ပံ့ပိုးမှုများဖြင့် ဆက်လက် ကြိုးပမ်းလျက်ရှိပါသည်။

• နာမည် တစ်မျိုး မက ရှိသော ကျေးရွာများ - ဤကဲ့သို့သော အခြေအနေသည် ဘာသာစကား အမျိုးမျိုး အသုံးပြုသော နေရာဒေသ များတွင် ဖြစ်ပွားလေ့ရှိပါသည်။ MIMU ၏ Pcodes စာရင်းသည် ကျေးရွာများ၏ (နိုင်ငံတော်မှ ခေါ်ဝေါ်သော အမည်များ အပြင်) ဒေသ သုံး အခြား အမည်များ ကိုလည်း ထည့်သွင်းဖော်ပြနိုင်ပါသည်။

• ကွဲပြား ခြားနားသော အုပ်ချုပ်ရေး ဆိုင်ရာ ဖွဲ့စည်းပုံ – ဤပြဿနာသည် ကွဲပြား ခြားနားသည့် အုပ်ချုပ်ရေး ဆိုင်ရာ ဖွဲ့စည်းပုံ အသုံးပြုနေသော ဒေသများ အထူးသဖြင့် ဝ နှင့် ကိုးကန့် ကိုယ်ပိုင် အုပ်ချုပ်ခွင့်ရ ဒေသများတွင် တွေ့ရနိုင်ပါသည်။